පිලිස්සුනු සී.එෆ්.එල් විදුලි බුබූලු නැවත පාවිචිචියට ගමු....

විදුලි බිල අඩු කරන්න තියෙන හොදම විසදුම සී.එෆ්.එල් විදුලි බුබුලු පාවිචිචි කරන එක කියන කාරණය අප කවුරුත් දන්නා දෙයක්. ඒත් හොද වර්ගයේ සී.එෆ්.එල් විදුලි බුබුලක මිල නම් ටිකක් විතර වැඩි නිසා බොහෝ වෙලාවට පේව්මන්ට් එකේ රු 50 ට 60ට විකුණන්න තියෙන සී.එෆ්.එල් විදුලි බුබුලි මිළදී ගැනීමටත් බොහොමයක් දෙනා උනන්දු වනවා. නමුත් ඒවයින් අප බලාපොරොත්තු වන තරමේ හොද ආලෝක තත්වයක් නොලැබෙන බව නම් අප අත්දැකීමෙන් දන්නා කරුණක්. කෙසේ වුවත් මේ ඕනෑම වර්ගයේ සී.එෆ්.එල් බුබුලක් පිලිස්සුනු පසු නැවත පාවිචිචියට ගැනීමේ හැකියාවක් නම් නැහැ.

නමුත් මම මේ කියන්න යන්නේ පිලිස්සී ගිය සී.එෆ්.එල් බුබුලක් නැවත පාවිචිචියට ගත හැකි ක්‍රමයක් ගැනයි.  සාමන්‍ය විදුලි බුබුලක තිබෙන්නේ සූත්‍රිකාවක් පමණක් වුවත් සී.එෆ්.එල් බුබුලක සූත්‍රිකාව අඩංගු ටියුබයක් වැනි කොටසට අමතරව විද්‍යුත් පරිපථ කොටසක්ද ඇතුලත් වනවා. පිලිස්සී ගිය බොහොමයක් සී.එෆ්.එල් බුබුලු පරීක්ෂා කිරීමේදී පෙනී ගිය කරුණක් නම් වැඩිමණක් බූබුලු වල පිලිස්සී තිබෙන්නේ සූත්‍රිකාව අඩංගු ටියුබ් කොටස බවයි. ඉතිං ඔන්න දැන් මම තව ටිකක් අතීතයට යනවා. මතකද ඒ දවස් වල අපි පාව්ච්චි කරපු ෆ්ලොරසන්ට් බල්බ් එක එහෙමත් නැත්නම් අප කවුරුත් දන්නා බාසාවෙන් හදුන්වන ටියුබ් බල්බ් එක . දැන් නම් ෆ්ලොරසන්ට් බල්බ් පාවිච්චි වන්නේ ඉතාමත් අඩුවෙන්. ඒකට හේතුව වශයෙන් මා දකින්නේ ෆ්ලොරසන්ට් බල්බ් වල තියෙන Choke එකේ   මිල රු 300 කට ආසන්න අගයක පැවතීමයි. ඒ ගාන දීල Choke එකක් අරගෙන ෆ්ලොරසන්ට් බල්බ් එක නැවත හදා ගන්නවාට වදා ලාබයි හොද වර්ගයේ සී.එෆ්.එල් බල්බ් එකක්ම සමාන මුදලකට මිලදී ගන්න එක.

ඉතින් මම කියන මේ වැඩෙටත් අවශය වන්නේ ඔන්න ඔය ටියුබ් බල්බ් එකක්. හැබැයි මිල අධික Choke එක Starter වත් එකවත් මේ කාර්යයට අවශය නැහැ. මුලින්ම පිලිස්සුන සී.එෆ්.එල් බුබුලක් අරගෙන පරිස්සමෙන් එහි කොටස් දෙක වෙන් කරගතහැකි ස්ථානයෙන් වෙන් කරගත යුතු වනවා. දැන් ඔබට පෙනී යනවා ඇති සූත්‍රිකාව අඩංගු ටියුබ් කොටස විද්‍යුත් පරිපථ කොටස හා සම්බන්ධ වන්නේ කුඩා කම්බි 4කින් බව. සමහර බල්බ් වල නම් මේ සම්බන්ද කිරීම ඊයම් වලින් පාස්සා තිබෙනවා, නමුත් සමහර බල්බ් වල නම් ඊයම් වලින් පාස්සන්නේ නොමැතිවත් තිබෙනවා. කෙසේ වෙතත් ඔබ හට සිදුවෙනවා මෙන්න මේ කියන කොටස් දෙක පරිස්සමින් වෙන් කර ගැනීමට.ඉන් පසු කළයුත්තේ පරිපථ කොටස හොද තත්වයේ ඇත්දැයි පරීක්ෂා කර ගැනීමයි. මේ සදහා නම් මල්ට් මීටර් කියන උපකරණයේ ඇති වෝල්ට් මීටරයක් අවශ්‍ය වනවා. නමුත් ඔබට දැනට, වෝල්ට් මීටරයක් හෝ , මල්ටි මීටරයක් නොමැති නම් මෙම පරීක්ෂා කිරීම කළ නොහැකිවනවා. අධර්යයමත් වන්න එපා. පරීක්ෂා කිරීම අත්‍යවශයම නැහැ.

වෝල්ට් මීටරයක් තියෙනවා නම් පරීක්ෂා කරන්නේ මෙන්න මෙහෙමයි. අදාල පරිපථයේ හෝල්ඩරයට සම්බන්ධ කළ හැකි කොටස ප්‍රධාන විදුලි මාර්ගයට සම්බන්ද කරන්න. මේ සදහා නිවසේ තිබෙන සාමන්‍ය විදුලි බුබුලක් දැල්වීම සදහා පාවිච්චි කරන හෝල්ඩරයක් යොදාගන්න. එසේ සම්බන්ධ කිරීමේදී ඔබ අනිවාර්යෙන්ම පාවහන් පැළද සිටිය යුතු අතර , සී.එෆ්.එල්. පරිපථය කිසිදු විටක අතින් නොඇල්ලිය යුතුය. තවද සී.එෆ්.එල් පරිපථයේ තිබෙන කම්බි වැනි අග්‍ර කොටස් 04 වෙන් වෙන්ව තිබිය යුතුය. එනම් එකිනෙක ස්පර්ෂ නොවී තිබිය යුතුය. දැන් ඔබ කල යුත්තේ සී.එෆ්.එල් පරිපථයේ තිබෙන අග්‍ර 04න් දකුනු පස තිබෙන අග්‍ර 02 වෝල්ටීයතා මානයෙන් වෝල්ටීයතාවය මැන ගැනීමයි. මේ සදහා ඒ.සී. 230V වෙත වෝල්ටීයතා මානය සකසා තිබිය යුතුය. මෙම පරීක්ෂාවෙදී ලැබෙන වෝල්ටීයතා අගය 60V 110V අතර අහගයක ඇත්නම් ඉතිරි අග්‍ර දෙකේද ඉහත පරිදිම වෝල්ටීයතාවය පරීක්ෂා කරගන්න.දකුනු පස සහ වම්පස අග්‍ර දෙකෙහිම ඉහත පරිදි 60V-110V අතර සමාන වෝල්ටීයතා අගයක් ලැබුනේ නම් එයින් කියවෙන්නේ සී.එෆ්.එල් පරිපථය හොද තත්වවේ පවතින බවයි.

හොදයි, පරීක්ෂාකිරීම කලා නම් ඔබ අනිවාර්යෙන්ම දන්නවා සී.එෆ්.එල් පරිපථය හොද තත්වයේ ඇති බව. පරීක්ෂා කිරීම නොකළා වුවත් මී ලගට ඔබ කල යුත්තේ සී. එෆ්. බල්බයට ගැලපෙන ආකාරයේ ෆ්ලොරසන්ට් බුබුලක් වෙළදපලෙන් මිළදී ගැනීමයි. වෙළදපළෙන් අපට 18W සහ 38W වශයෙන් දෙයාකාරයක ෆ්ලොරසන්ට් බුබුලු ලබා ගැනීමේ හැකියාව තිබෙනවා. 18W එක අඩි 02ක දිගකින්ද, 38W එක අඩි 04ක දිගකින්ද යුක්ත වනවා. ඔබේ සී.එෆ්.එල් බල්බයේ සදහන් Watt ප්‍රමාණයට ගැලපෙන ෆ්ලොරසන්ට් බුබුලක් මිළදී ගන්න. 18W බුබුලක මිළ රු.85 ක් පමණ වනවා.දැන් ඔබ කළ යුත්තේ සී.එෆ්.එල් පර්පථයේ තිබෙන විදුලිය පිට කෙරෙන අග්‍ර 04න් වම් පස කෙළවර අග්‍ර දෙක ෆ්ලොරස්න්ට් බුබුලේ එක් කෙළවරකත් දකුනු පස කෙළවර අග්‍ර දෙක ෆ්ලොරස්න්ට් බුබුලේ අනිත් කෙළවරටත් සම්බන්ධ කර ගැනීමයි. ඉන්පසු ෆ්ලොරස්න්ට් බුබුලේ හෝල්ඩර් කොටසට ප්‍රධාන විදුලියට සම්බන්ධ කර බලන්න. ෆ්ලොරස්න්ට් බුබුල දීප්තිමත්ව දැල්වෙනු ඇත. නමුත් සාම්න්‍ය ෆ්ලොරස්න්ට් බුබුලක් මෙන් ගැස්සි ගැස්සි නොව සී.එෆ්.එල් බුබුලක් මෙන් එක වර දැල්වෙනු ඇත.මේ සදහා සුදුසු ආධාරකයක්/රදවනයක් නිර්මාණය කර ගැනීම ඔබ සතුයි.